पार्टीभित्र अन्याय भएको भन्दै प्रदेश सभा सदस्य, पार्टी र प्रमुख सचेतकको जिम्मेवारीबाट राजीनामा दिएका ठम्मर विष्टले एमाले रोज्ने भएका छन् । आज बिहान ११ बजे वीरेन्द्रनगरको सिटी हलमा आयोजना गरिएको वृहत भेला कार्यक्रममा उनलाई पार्टी प्रवेश गराउने कार्यक्रम रहेको एमाले सुर्खेतका एक नेताले रातोपाटीलाई जानकारी दिए । उनलाई नेकपा एमालेका वरिष्ठ नेता ईश्वर पोखरेल पार्टी प्रवेश गराउने कार्यक्रम रहेको छ,’ ती नेताले भने ।
विष्टले फागुन २७ गते इमेलमार्फत प्रदेशसभा सचिवालयलाई राजीनामा पत्र पठाएका थिए । शुक्रबार कर्णाली प्रदेश सभाका सभामुख समक्ष प्रदेश सभा सदस्य छोडेको सनाखत गरेका बिष्ट त्यसको ठिक दुई दिन पछाडि नै एमाले प्रवेश गर्ने भएका हुन् ।
बिहीबार नेकपा माओवादी केन्द्र कर्णाली प्रदेश संसदीय दलको बैठकले बिष्टलाई राजीनामा फिर्ता लिन र पार्टी काममा फर्कन निर्देशन दिए पनि उनले उक्त निर्देशन दिएपनि उनी माओवादीमा एकवद्ध हुन चाहेनन् । आइतबार बिहान विष्टले व्यङ्ग्यात्मक तरिकाले भने,‘ पार्टी प्रवेश होइन एकता गर्ने हो । सँधै प्रचण्डको अन्याय कति सहिरहने ।
उनले आफूमात्र नभई सुर्खेत निर्वाचन क्षेत्र नं.–१ मा रहेका माओवादी नेता, कार्यकर्तालाई पनि एमालेमा प्रवेश गराउने संकेत गरे । यदि उनले त्यसको गरेको खण्डमा उक्त क्षेत्रमा कमजोर रहेको माओवादी अझ कमजोर बन्ने देखिन्छ ।